IT 之悲劇 – 第三章 – 「初出茅廬」(1)
「Work banishes those three great evils : boredom , vice, and poverty」 — Voltaire , French philosopher
(好似係: 工作可以打走三隻魔鬼：無聊、墮落和貧窮。- 伏爾基泰, 法國哲學家)
呢份工其實就係 Operator ，就係之前我講係數據中心O既操作員。
Operator 呢份工似乎俾我想像中好，至少人工係八九千到，個 Agent 話加埋番夜可以多一千幾，即係成萬幾蚊。萬幾蚊喎，比我之前見D 工好好多，唔使俾人奚落先啦。見工過程真係冇乜難度，想像唔到咁順利，結果呢份係我第一份工。
人工可以萬幾，我大可以去番 Jerry 度串佢一下佢，我俾人請左，佢有眼不識泰山。但當然我冇咁做啦。
不過跟Agent 比較慘，好似次人一等咁。工資冇長工咁多，人工仲要十號先出到，真係怕佢執左冇錢拎番。
話時話唔知由幾時開始，好多 IT 工都經 Agent ，續 Contract。有D Contract 簽一年，有D 簽半年。半年真係唔用你，你半年後又要搵過。我就見過鬼怕黑，做過兩三次Contract 工，就下定決心冇下次! 點解? 呢D 我之後先解釋了。都係開始講番呢份初出茅廬O既工先。
Agent 話呢幾年都投左做政府 Project，所以我都會安排去做政府個度。呢間Agent 公司，除左政府好似仲有一兩間公司放人入去，乜公司我冇研究。不過政府做野，心諗應該幾Hea，哈…..
政府DC ，分三個地方，荃灣，灣仔，西貢 (嗱，我冇犯法起底呀，政府網頁有寫) 。而我就周不時要三個Site 都去，我唔記得係咪每個月一個地方，差唔多啦。
(頭盔先: 我在此只講工作點滴，唔會公開入面有乜資料。希望政府唔會告我啦!)
頭一日就去左總部灣仔報到，見左大阿頭 Jason。Jason 高高大大，睇落四十幾近五十歲，少許頽頭，個樣兇兇地。
Jason : 呀，你好呀Jackie 呀可? 叫我Jason 得啦。
我: 係。 (今次有人帶俾佢知我係Jackie，唔似Jerry 咁on 99 問多次。)
Jason : 嗱，第一日其實就冇乜野做姐，你簽個到先。本簿呢度，簽左先計你番工呀，記住每日簽到。
我: 好，好。
Jason : 我唔解釋咁多野你知住，你呢幾個月會派去荃灣先，另一個叫 Ronald O既Leader 學下野先，你簽完係前面個位坐坐先啦。
Jason 甚有禮貌，同佢樣兇兇地不大相稱。我簽完到，坐左一輪，好鬼眼訓。大致上因為冇乜訓過，只訓四個鐘到，有D 緊張掛。
不過坐到十二點幾都冇人理我，跟住Jason 同我講:
Jason: 食飯先啦。
嘩，悶左半日就食飯，下晝都唔知點過。
見到D 同事，佢地ON 99 望住個電腦Mon 唔知做乜。心諗唔通我都係做呢D? 坐到呆呆下，如是者，到四點半佢先再同我講野。
Jason: 嗱，你聽日九點去呢度寫個地址，搵 Donald。佢會帶你做野啦。
我: 啊，好呀。
Jason: 你五點走得架啦，記住簽到。我早番D，我呢家走先。
估唔到第一日番工咁悶，已經開始諗呢份工係咁適合我。
第二日，準時搵Leader Donald 。
Donald : Hey ，Jackie 呀嘛，我係呢度Oper Leader ，等我介紹下我地 Teammate 先。
Donald 都係睇落四五十，但165 CM 到，比較矮細，頹大半頭。同普通阿伯冇乜分別。
Donald 笑笑口咁講:
Donald : 呢位係Kevin 。
Kevin 睇落成支竹咁，好瘦同高，180 CM 到，面尖尖。唔知點解叫親Kevin 都係瘦瘦地。同 Kevin 握過手後，Donald 再介紹。
Donald : 呢位係 Kent 。
Kent 又係瘦瘦地，國字口面，好正氣樣。
Donald : 呢位係 Kathy。
Kathy 成個 TB 樣，唔講名以為係細路仔，睇真D 皮膚滑D 又冇喉核先覺係女黎。唔知點解 TB 一定係英文名得一至兩個音節，你從來唔會聽過一個TB 叫 Isabella或者 Victoria 掛。
Donald: 最後呢位肥仔係 Albert.
Albert 應該二百幾磅，面圓圓的毒樣。個人黎講好憎呢類樣。
Teammate 介紹過、握過手後，佢叫我坐低，開始講介紹 DC 同工作範圍。
Donald: Jackie ，我地呢度做Operator 好簡單，睇住個Data Center ，做一D Daily 工作就得，好易搞，跟指引做就得。有乜唔明千祈唔好自作主張，有乜唔明就問左先。做野記得寫底d 野，唔好問完又問。呢家俾左紙同筆你先啦。
跟住佢開手畫圖。
Donald: 我地Data Center 放 equipment 你都知架啦，咁我地有好多儀器 monitor 住，先可以跟到 ISO ，先可以 Cert 到。首先要記住 「風火水電」呢四樣野。咁「風火水電」係咩黎呢。「風」即係Cooling ，控制溫度濕度，維持D 電機正常操作環境。呢度有幾部Chillers 分別控制所有位置。「火」即係防火，呢度有 FM200 個D滅火器，系統會測住，有事就會自動滅火。「水」就係防水，呢度有防水線係地下，有漏水就會有alarm。「電」係我地有兩邊電力supply ，兩邊發電站供電，如果死左其中一邊，另一邊都OK 仲supply 到。亦都有柴油發電，有乜事都有幾個鐘後備電。
跟住佢帶我去幾個 mon 前，續道:
Donald : 嗱，呢度你可以睇到各樣風火水電 monitor ，其實唔使睇實O既，有事就有聲alert 我地架啦。
Donald 依然笑笑口:
Donald :呢個就CCTV ，睇各度門出入位姐，冇乜特別。
佢拍一下手:
Donald : OK，咁大約係咁，有冇乜問題?
我: 冇乜住。
Donald : 咁呢家落去 Data Center 做D 野。Kathy ，今日你offsite，一齊落埋去啦。
Kathy: 哦。
DC 真係好鬼涷，雪房咁。
Donald 話帶我地走一圈先，去到某角落，拎起張紙，上面一堆數字。
Donald : Jackie ，呢個係濕度溫度紙，我地隔三個鐘要落一次黎寫番低濕度溫度。
之後Donald 填上濕溫度。
我心諗，都幾無聊，唔通我讀咁多書，以後就填下濕度溫度?
跟住佢走左一圈，話俾我地知紙放係乜地方。
Donald : 好啦，咁Kathy 呢家就會做每日動作，Offsite 運帶。你知唔知咩係 Offsite?
我 : 呀，未聽過呀。
Donald : 嗱，其實呢，每日Data Center D 機都會Backup O既，咁每日Backup 出黎d 帶，某D就唔會放係自己Data Center 度，會運去其他DataCenter 。因為怕咁唔好彩咁，炸左DataCenter ，D 帶都仲係第二度運番過黎嘛。好似Kathy 就會將尋晚執左出黎要 Offsite D 帶，運去西貢。咁佢會跟埋車去西貢O既，之後又運番一批帶原車番黎。
我心諗: 下，仲要做搬運工人?
只見Kathy 手快快，已經執晒D 帶出黎入晒盒，推去停車位上車了。
Donald 又黎笑笑口，唔知點解咁好笑…..
Donald: 好啦，我地上番去先。
跟住大家一齊落去DC。
搭Lift 個時:
Donald : 呀Jackie ，其實呢點解你會做呢份工O既?
我 : 哦，我好耐冇搵到工啦。見到呢份都幾好人工，入黎做囉。
Donald: 出面唔好景咩，應該都仲幾好掛。不過應該差左唔少，科網爆左之後都好似少左工。我就冇乜留意，係電視報過下。
我: 認真唔太好呀。
Donald: 你入黎呢度做，一定會悶啦。你好似大學畢業喎?
我: 係呀。
Donald: 大學畢業最好搵過份正正常常啦，係度做真係唔係太好， 你Contract 簽一年?
我: 係呀。
Donald : 其實呢，我地呢D ，即係阿Kent Kevin 呀，都係做左十幾年，有仔有女都走唔甩。個時未係強積金，我都係為長俸都先係度做。你呢D 年輕人真係要係外面學下野，唔應該係呢度發霉啦。
我: 咁唔係O既，我真係搵唔到工住嘛。啊，咁Kathy 同 Albert 呢?
Donald : 佢地做差唔多一年啦，但係佢地都係中五畢業個D 黎喎好似。
我: 哦，唔緊要O既，做住睇下點先。
Donald: 都得，騎車搵馬先囉，後生仔大把時間。
就係咁開始左oper 生活，準時放工準時收工，其實相比起之後O既工作工時真係唔錯，以後都冇乜邊份工係準時走。
做左兩個禮拜到，我帶個support 落DC 。但我地次次都要落去陪佢，全個過程係要睇住佢做野，你話幾無聊。
我落到場，企係佢後面都冇乜野做成十五分鐘，又要看住佢，都唔知搞幾耐，心諗不如同佢傾下計。( 其實到我做support落場，都唔少Oper 會問我做D 乜…….)
我 : 阿師傅呀，其實要搞D 乜架，搞好耐架?
師傅: 哦，好快姐，一個鐘應該搞得晒，落Fix 咋嘛。
我: 哦，係咪好似 Window 98 個D 落下 fix pack 咁咋?
師傅: 無錯無錯。好快架咋，你搵個位坐下啦，唔使企係度架喎。
師傅以為我催佢，其實係想了解佢做D 乜姐….
我: e ? 呢部係咪D Unix 機黎架?
師傅: 係呀，Sun 個D 機，行 Solaris 嘛。你玩過呀?
我 : 玩過下呀。我個時大學用黎 ftp 下野咁囉。
以前大學用過 Solaris 7 (好似係)，但係從未見過部機，都係login 下 command 或者開 GUI。見到 support 開個介面似係，見咁樣問佢。
師傅: 哈哈，ftp 下野咁簡單…..大學生喎，做Oper 咁慘呀?
心諗: 喂，師傅，呢句乜意思，大學生唔做得Oper 架咩?
師傅: 呢家唔少 Application 係大機轉番落去呢 D Unix 機嘛。呢炸機你見都係年頭裝起O既，好快落晒fix 架啦，差兩部，你等等啦。
講完，佢又硬直笑笑口樣咁出Lift。
我: 呀師傅，其實唔係催你呀，悶悶地問下你D 工作係點姐。
師傅: 哈哈，又有幾悶呀，打份工姐。不過大家吹下水都易過D O既，其實我都係係度等。
似乎我咁講之後，佢就唔覺我催緊佢。
師傅: Oper 我都做過，你話人工高我唔拘呀，日日Hea Hea 下。
我: 唉，我覺得唔太掂呀，番左兩個禮拜都好頽咁啦。
師傅: 頽係頽呀，但Oper 呢度都好似幾高人工架喎。
我: 下，一皮到咋喎，都多?
師傅: 哦，你應該係 Contractor 呀?
我: 係囉。
師傅: 你知唔知呢度做個D 老鬼差唔多都兩皮。
我: 多咁多? 做左好多年?
師傅: 佢地九七前留落黎架嘛。唔係合約，又有長俸，正好多啦。係呢家請人一定經 Agent 先可以平D嘛。同埋佢地又做左幾年都有。
我: 哦。
我點頭示意明解，感覺遲左出世。
師傅: 如果有兩皮又有長俸，做 Oper 我又有乜所謂呀。
我: 唉，咁呢D 野都係時勢問題。
師傅: Contractor 遲早都係走啦，冇得升，人工又未必加，仲可能約都冇得續。你仲要又係大學生添。
我: 大學生咪又係咁，唉 ……. 咁你個D 野又好唔好做? 好似幾多野玩咁喎。
師傅: 唉，唔係我玩呀，打份工姐。我其實都叫做有D 興趣做呢D，都係跟下 project ，裝野，implement 咁囉。我地呢D 都幾Free 架，番工放工都冇乜話定時，做好就OK。成日周圍去，都岩我性格O既。
我: 咁好唔好做先?
師傅: 咁我問番你點為之好做先? 你要人工? 學野? 定辛唔辛苦先? 我做個D 野都煩架，成日要 update D 所謂 technical 野，又會俾人追 timeline。不過呢家做政府就冇咁趕咋，之前個份俾人追到頭都爆。我就叫係有興趣囉，多野學，對比Oper 冇咁悶O既。
我: 哈，我之前都係寫過下 web 呀，asp 呀咁。
師傅: 咁呢D 又同我地冇乜關係喎，我地搞 Server 個D。Unix 你未必接觸啦，但你平時有冇玩下 Linux ?
我: 我都想搞部機試下，好似Red hat 岩岩出到7.1 呀?
(其實我久唔久都睇下雜誌上網Update 知下D IT 野…..)
師傅: 哦，咁你屋企可以試下呀，其實有D 似 Unix 囉，個概念有D 同，你玩下先囉。
佢繼續…
師傅: 其實server 野好多野架喎，有email 又有 name server 個D，好多野搞架，你睇本書仲好。
我: 咁我得閒落黃金昅昅先。
跟住師傅同我講唔少科網股未爆個情況。佢地出黎做個時頭兩年，一條友四五個 Offer 都唔出奇。因為其實佢一開始都係做 Network 先，只不過越做越近 System 野，所以兩邊都掂咁話。不過時勢就係咁，你幾勁技術底，一個大浪打埋黎唔係咁易企得住。如果你用06年打後個時勢相比，01 年後個四五年簡直差天共地 …….
份工的確好悶，係屋企唯有 Set 下 Server 學下野，都係解悶方法。睇書唔止睇 Server 野，仲諗住考CCNA，Solaris 。講真如果個日唔係我撩個師傅傾計，都未必仲係呢行。呢D 係咪就所謂蝴蝶效應?
不過做左三個月之後，夜晚同班舊同學食完飯番屋企。
記得番屋企個時阿媽開門，劈頭第一句就話:
媽: 嘩，阿峰，今次真係大獲啦……………
當時的Redhat 書….
對唔住，我未講自己咩名。其實我叫陳建鋒，老媽仔會叫我阿峰。
我: 做乜大叫呀你。
我成日都覺得阿媽好囉唆，講好多野，仲要乜小事都大吵大叫。本能反應叫佢收聲先。
媽: 嘩，頭先美國呀，有架飛機撞埋左橦咩世貿大厦 !!
我: 下，唔係掛，咁恐怖?
衫都冇換，企住係度睇電視報導點撞。片段 Reply 又 Reply ，好似今次真係好大件事。
最後兩座野竟然倒塌，我個下真係睇到有d 起雞皮。
媽: 唉，阿峰，你話等出年搵工，應該仲難啦……
我間唔中都會同阿媽講下自己番工D 野，所以都透露左好想轉工。然而一年 Contract，如果早走要賠番一個月，我同佢講過都係番一年先睇下點。估唔到有恐怖襲擊拖到個市真係雪上加霜。
911之後….你地個時做緊乜?…..
我: 唉，算啦，我做一年先睇下點，份約一年呀嘛，可能一年後冇乜野呢。
結果個市越來越差，我地呢D 冇乜經驗O既根本冇乜可能搵到工。人工出價亦越來越低。我識幾個師弟遲一年畢業，佢地只有一個做番本行。佢就搵到份 programmer ，人工得五千五。其餘有D 做物業管理，有D 做普通出入口文員算啦，有D 就係小學中學做 support 。冇計，IT 相對人工勁低，有時D POST 見到出四千都得。你話你等開飯而唔搵其他行業做，就真係等死。咁當然仲有幾個唔甘心搵唔到 IT 工，直至到03 年二月到先入行。
就咁膠左差唔多一年，結果都搵唔到其他工續約住先。咁又會膠多一年啦，心諗唔同好似無間道陳永仁咁，三年之後又三年?
續完約之後，有晚番夜，有 Leader Donald 、Kent 、Kathy。悶悶地，大家拎副Pair 牌出黎玩。
其實番夜做晒D野冇野做，冇人管，我地平時都會搵野玩打發時間，有時係 UNO ，有時睇下碟 (都試過睇AV 架)，有時討論時事話題。最後會分時間大家訓兩三個鐘，有事先叫醒大家。
咁今晚就係玩耡 Dee啦。因為我地輸左會請食宵夜，其實都幾緊張架，用呢招黎提起精神係唔錯!
玩過半巡，又係我赢，負責洗牌。Donald 就拉退後張櫈，睇下我放係枱頭D 書。
Donald: 嘩，Jackie ，D 書你架? 乜你咁勤力呀，要考試呀。
枱頭係我平時帶番工，有時會無聊就睇下D Solaris ，RedHat，MCSE仲有Networking CCNA 野。
我: 我，係呀，睇下學住先姐。遲下考一份野，呢家睇住先差唔多。
Donald : 咁都好呀，考好出去搵過份。好過我地要係呢度過埋下半世，哈哈。
我: 咁唔好咁講，你地都好勁呀，我好多大機野都唔識。
Donald: 哈，我地中五畢業，係咁好彩以前搵到呢份政府工先好D 咋。你諗下我地呢D 中五學歷可以做D 乜，基本上係呢個年代冇Value 架啦。我有D 舊同學呢家都係做下散工，你話唔做呢份我地仲可以做D 乜。哈哈 ….. 不過家個市好似幾差喎，續約前有冇搵工?
趁佢講緊已經做埋 Cut 牌，派牌動作。
我: 差到爆啦，人工都仲要勁低個隻，四千蚊請Programmer 你話離唔離譜，唉。
Donald 出住牌講。
Donald : 咁 Kathy 你都冇搵下工呀?
Kent 就沖出黎答咀。
Kent : 你同佢定啦，人地條女會計師黎架。哈…… 有人養，點同呀…
Kathy 笑住，打佢手臂一野，好似好sweet咁。
Kathy: 屌你啦，我呢D 唔食軟飯架，佢有佢我有我架。
Kent: 我又Dee 你啦 (笑住，出隻Dee !)，佢會計師你講都成三皮喎。起碼租樓佢都出多D 掛。
我同Donald 都Pass。
Kent : 嗱，Jackie 咪我我話，人地會計幾好，三皮野。你諗下 IT 幾可三皮呀，你有冇識人做 IT 高人工 ? 呢家入職七千都冇，都唔知捱幾耐呀…… 哈，出 10仔俘先 (條友五隻牌壓實枱面，好似怕風吹走咁。)
Donald : 咁又係呀，會計有專業試，點同 IT 個d 得 Vendor Cert 。又會 expire…..
大家揮手示意Pass….
Donald : 不過呢，錢唔係話一定係番工度搵O既。就算你幾萬蚊月入，有D 人都洗到突一突，儲唔到幾多。錢多就大使，好多人都係。
Kent : (又出俘! ) 係啦，要好似你地 Leader 咁，投資下呢家有兩層樓，先係皇道呀。哈哈 …… Donald 哥，你仲有間公司喎…..
Donald: 唉，有仔女已經洗好多啦，好彩以前儲下錢咋。公司呢家野只係小小副業，當另外少少收入咋。
大家揮手又示意Pass….
Donald: Jackie ，其實如果你出去做野，唔好只係睇你做緊野個範圍呀。留意下經濟係點，點投資，咪亂洗錢。有時你有呢方面觸角，會避開好多危機野架。就好似到時你去個間公司，有冇收入你點都要知掛，一間得個做字冇錢賺就炒人個時你都未知。
Kent : (又出俘! ) 算啦，Jackie，你都係捱埋呢年先，同我地玩多年UNO 耡Dee 先啦，哈哈，……..係咪冇人出啦…..Hehe …..今次我結…..!
Kathy: Pass 呀 (拍一下枱)，冇啦，各自分一半咋。
Kent: 係喎，Jackie 條女做乜架?
我: 冇呀……
Kent: 屌，冇做野定冇女呀，哈哈。
我: 冇女呀 …….
Kent : 哈哈，唔使咁唔耐煩咁喎，叫Kathy 介紹D 俾你囉。
Kathy: 屌你，我個D 個個都Les，邊岩佢呀。
Kent: 你快D 搵番個，好似Kathy 咁食軟飯咪幾好。
Kathy: 我真係屌柒你 。 (跟住一拳打落佢手臂)。
Donald: 唉，咪鬼打啦，玩完廿局啦。Kathy 又係你請食宵夜呀，哈哈。連續三晚……
Kent: 好似你咁續三年約呀，哈。
Kathy: 仆街啦你 !! (跟住又一拳打落佢手臂)。
諗番起其實呢班同事幾好玩，至少大家有乜事都會互相幫助，又乜野都傾到。唔似得其後幾份工咁，個個人黑口黑面，講野有骨。仲有D 人會奚落你，玩你，篤背脊，咩人都有。辦公室政治就係咁，人事問題仲煩過你工作問題。
如是者過左大半年，都仲有幾個月完約，心諗係時候都搵下工先。但個市都係咁差，POST 出黎O既工都冇乜，成個禮拜 IT 工真係十隻手指數得晒。
不過估唔到O既係，仲可以低處未算低 !
有日放工番黎:
媽: 嘩，阿峰，今次真係大獲啦……………
我: 做乜大叫呀你。
今次本能反應都係叫佢收聲先….
媽: 你呢家只街番工小心呀，呢家咩非典型肺炎呀，野到會死人架。我入定D 口罩番黎啦，你番工記住戴呀。仲有D 濕紙巾，帶埋平時抺手啦。
入到房見到十幾盒仔口罩放晒係枱面，心諗使唔使呀 ??
但原來真係咁勁，個個人都直情係驚到呢….唔好話去旅行，連正常人放工都盡快番屋企。
番工日日戴，做乜都戴住，勁唔方便。又要洗手，仲要有時戴手套。
呢家好多撳Lift 個塊版仲有包書膠，都係個時留落黎O既清潔概念……心諗，有塊膠同冇塊膠咁抺係咪真係咁有分別? 同埋D 人永遠都會篤爛開門閂門制個膠，根本一撚樣……..
呢對新人有個特別婚禮，唔知佢地婚妙相有冇口罩版呢…….
記得個時要看住一D Vendor 標書，我地要本本書人地睇完就抺一次。真係做埋清潔工人 !
其實呢D 標書其實放一係間房，俾我地政府 D 人Review 邊間可取。過程係咁: 比如話出名D IXM、PXXW，要投政府某D project黎做，就好似 E 道咁之類啦。就要出RFP (Request for Proposal) 俾呢D Vendor 去投。而呢D 標書包括要寫好會點做、有乜經驗、有幾多人、有幾多資源、洗幾錢之類。寫呢D 野真係難到嘔泡，好多大Project 唔係用幾多頁紙計，係以幾多吋去計 ! 而呢次招標好似 IXM 都只係寫左三四本加成呎O既書，我諗睇個個都一樣辛苦。
某日，如常執帶出車 offsite，亦如常要戴口罩。
個 D 帶其實好易執，係一部 Tape Library O既物體，嘔一埋每日Backup 完O既帶出黎。呢D 帶好少可執錯，因為帶上面 Barcode 大大隻字，仲要每隻字有唔同顏色，好似當你D Oper 發雞盲都可以執到咁。拎出黎跟番出面貼個D Barcode 放番入盒，再上車索住佢就走得。
但呢架車唔係D 乜專業運輸車，係一架藍色中型貨車，好似你平時見到個有塊「依馬打四季平安油」o既布個類車。
呢D 帶，個時應該LTO……
我今次要同 Kathy 出車。今次係荃灣去西貢再番荃灣。
去西貢個程如常咁走，又訓著左，冇乜特別。
到回程個時，上車冇耐，Kathy 就話:
Kathy: 唉，唔想成日出車。
我: 下，點解呀。我覺得幾好呀，唔使成日係公司咁悶喎。
Kathy: 唔係掛，你知唔知點解係得我地Contractor 先出車，佢地唔出?
我: 哦，好明顯係要佢地留守囉。
Kathy: 哈，梗係唔係啦。
我表示疑問。
Kathy: 你都知呢D 雞車都係外判啦，如果個撞車呀個d 保險呀都係雞車公司包。如果係政府員工坐車，有乜事o既話，政府就要賠好多架。如果係 Contractor ，咁 Agent 就要包個保險嘛。
我: 哦，原來咁。So Far 咁耐都冇事，怕乜呀。
Kathy: 你以為啦，試過啦，前排 Albert 因為咁先走左。
我: 走左 !!! [???] 咁大獲? 幾時事?
我只見兩三個月前 Albert 冇再番，仲以為搵到份工。
Kathy: 屌，唔係呀，Quit 左份工咋，佢未搵到工都走。
我: 哦，咁個時因為咩話你話…撞車?
Kathy: 係呀，成架車炒左，人就冇事，但係都拗底啦。
我: 下，頂你嚇我。
Kathy: 咁呀，有乜事都煩啦，就算傷少少都煩啦。如果要 sick leave ，仆街 Agent 唔會計你番工架，你簽個時有冇睇清楚條款架。
我: 屌，咁我又冇點睇呀，咁Albert 點走呀。
Kathy: 挑，咪補錢走囉。未完約嘛。
我: 下………………..
個下都唔知點應，原來有D 咁o既事。我諗好多人 Agent 簽野，份約都應該好少睇清楚掛? 假日做野有冇補水，有幾多sick leave ，之如此類我都未必有為意。
點知呢，呢日就俾呢個死 TB 講中左，真係烏鴉口到呢…….
我: 唔? 咁有乜原因?
司機都有個跟車，連我同 Kathy 四條友。
我同 Kathy 坐係司機位後面個橫排位，佢坐靠左，我坐靠右邊。
當架車入左去荃錦交匯處個位，突然左邊有架車對埋黎! 個下直情插埋左左邊門 !
比著坐我左邊係一個正常男人，通常都會側一側身撞埋我度算。點知 Kathy 好鬼驚，一野撲落我身度，佢左手隔咁鬼遠都擒鬼我右胸，唔知呢D 係咪連 TB 都會有o既女人反應。不過個下都幾尷尬，因為我左手都撳住我條安全帶同個胸，變左佢個胸壓住我隻左手。個下Feel 到原來佢瘦瘦地，個胸都有d 起伏。講真咁耐都冇俾女人親近過，呢家好似沙漠搵到個小型綠洲咁，飲到少少清泉。
撞埋兩三秒到兩架車已經停左，而 Kathy 亦都只係俾我享受兩三秒清泉，就坐番正，叫左聲:
Kathy: 屌，仆街，咁都撞，唔撚睇野o既!
Kathy 右手捽下捽下左臂，好似撞到。不過佢拿高隻袖，睇到應該都係撞瘀少少，似乎撞到下之後先撲埋黎。
我就當然冇事啦，哈哈，因為 Kathy 都有D 肉地做 Buffer。
個司機跟車又會冇事，但係個司機流鼻血，都唔撞到D乜。
我: 有冇事呀你，最衰都係你啦，烏鴉口都爆…!
Kathy: 又懶我? 屌你講咁多，報警啦。屌，都唔知有冇扭親條腰!
Kathy 講完個跟車已經報警，而 Kathy 打電話俾阿頭。阿頭應該慰問幾句，叫我地等差佬黎先。
差佬黎左，同我地落左D 初步口供，就跟白車車我地落仁濟醫院驗傷。
本來我有傷就真係唔想去，但係廢事啦，陪埋佢啦。至於D 帶點算 ? 我都唔知，可能有車之後接番掛。
不過好彩我都跟埋佢去仁濟，如果唔係都唔會有人生最開心o既日子 …..
瀏覽相關文章
IT 之悲劇：IT 人的命運
IT 之悲劇 – 沒有節日的 IT 人
IT 之悲劇 – 年少傻豬
IT 之悲劇 – 第三章 – 「初出茅廬」(1)
IT 之悲劇 – 第三章 – 「初出茅廬」(2)
IT 之悲劇 – 第四篇 – 「雞工年代」(1)
IT 之悲劇 – 第四篇 – 「雞工年代」(2)
IT 之悲劇 – 第五篇 – 「窮忙都市」(1)
IT 之悲劇 – 第五篇 – 「窮忙都市」(2)
IT 之悲劇 – 第五篇 – 「窮忙都市」(3)
IT 之悲劇 – 第五篇 – 「窮忙都市」(4)
IT 之悲劇 – 第六篇 –「人生需要 init 6」(1)
IT 之悲劇 – 第六篇 –「人生需要 init 6」(2)
IT 之悲劇 – 第六篇 －「人生需要 init 6」(3)
